BERNKASTEL-KUES OG MOSELDALURINN - ÚTIVISTARFERÐ
HELSTU UPPLÝSINGAR
HJÓLA-, GÖNGU- OG SKOÐUNARFERÐ UM MOSELDALINN Í ÞÝSKALANDI!
Áin Mosel á upptök sín í Frakklandi og rennur til norður uns hún sameinast Rín við borgina Koblenz í Þýskalandi. Mosel dalurinn, við ána kenndur, er í Frakklandi, Lúxemborg og Þýskalandi. Ferðamannaiðnaðurinn blómstrar í dalnum og kemur þar margt til; náttúrufegurð, vinaleg þorp og bæir á árbakkanum, kastalar víðsvegar á hæðum, vínviður uppum allar brekkur, sigling á ánni, góðir hjólastígar og gönguleiðir – og svo léttvínin og matargerðin!
Dagskrá ferðarinnar er mjög fjölbreytt og samanstendur af hjóla- og gönguferðum, og einn daginn verður farið í rútuferð til Lúxemborg með viðkomu í borginni Trier á heimleiðinni.
Bækistöð hópsins verður á hinu „íslenska“ Gasthaus Burkard, þar verður gist og snæddir morgun- og kvöldverðir og þaðan farið í ferðir í ýmsar áttir, hjólandi, gangandi og akandi. Ef þörf er á verður einnig gist á Gasthaus Huwer en allar máltíðir verða sameiginlegar á Burkard.
Gasthaus Burkard er í Berkastel-Kues, snotrum 7.000 manna bæ, dæmigerðum fyrir svæðið, með falleg hús, góða veitingastaði, vínrækt, og kastala á hæð fyrir ofan.